கடந்த சில வருடங்களாக ரீ-ரிலீஸ் படங்களும் திரையரங்குகளில் நல்ல வரவேற்பைப் பெற்று வருகின்றன. அதற்கு உதாரணமாக 'கில்லி', '3' போன்ற படங்களின் ரீ ரிலீஸை சொல்லலாம்.
இந்த ரீ-ரிலீஸ் டிரெண்டில் கடந்தாண்டு வெளியான சில ரீ-ரிலீஸ் படங்கள் திரையரங்குகளுக்கு கைகொடுத்திருந்தன.
அதைத் தொடர்ந்து இந்தாண்டின் ரீ-ரிலீஸ் வெளியீடுகள் அஜித்தின் ‘மங்காத்தா’ படத்துடன் தொடங்கியது.
கடந்த ஜனவரி மாதம் ரீ-ரிலீஸ் செய்யப்பட்ட இத்திரைப்படத்தை ரசிகர்கள் திரையரங்குகளில் கொண்டாடியிருந்தனர்.
அதைத் தொடர்ந்து இந்த பிப்ரவரி மாதத்திலும் சில படங்கள் ரீ-ரிலீஸுக்கு சுடச்சுட ரெடியாகி வருகின்றன. அவை என்னென்ன என்பதைப் பார்ப்போமா...
‘பூவே உனக்காக’ ஒளிப்பதிவாளர் சரவணன் இயக்கத்தில், சிம்பு நடிப்பில் கடந்த 2008-ஆம் ஆண்டு திரைக்கு வந்த திரைப்படம் ‘சிலம்பாட்டம்’.
கடந்தாண்டே இத்திரைப்படம் மீண்டும் சிம்பு ரசிகர்களுக்காக ரீ-ரிலீஸ் செய்யப்படும் என அறிவிப்பு வந்திருந்தது.
இப்போது இத்திரைப்படம் ரீ-ரிலீஸுக்கு தயாராகி இருக்கிறது. சிம்புவின் பிறந்தநாள் ஸ்பெஷலாக இப்படம் இந்த வாரம் வெள்ளிக்கிழமை திரைக்கு வருகிறது.
இயக்குநர் கௌதம் வாசுதேவ் மேனனுக்கு இது சினிமாவில் 25வது ஆண்டு. அவருடைய முதல் திரைப்படமான ‘மின்னலே’ கடந்த 2001-ஆம் ஆண்டு பிப்ரவரி 1-ஆம் தேதி திரைக்கு வந்திருந்தது.
கௌதம் மேனனின் 25 ஆண்டுகால சினிமா பயணத்தைக் கொண்டாடும் வகையில் இப்படம் வருகிற 13-ஆம் தேதி ரீ-ரிலீஸ் ஆகிறது. மாதவன், ரீமா சென் ஆகியோர் நடித்திருக்கும் இப்படம்தான் ஹாரிஸ் ஜெயராஜ் இசையமைப்பாளராக அறிமுகமான திரைப்படம்.
இதைத் தொடர்ந்து மணிவண்ணன் - சத்யராஜ் கூட்டணியில் உருவாகி கடந்த 1994-ஆம் ஆண்டு வெளியான ‘அமைதிப்படை’ திரைப்படம் இன்று வரை கல்ட் கிளாசிக்காகக் கொண்டாடப்படுகிறது.
இத்திரைப்படமும் கூடிய விரைவில் ரீ-ரிலீஸ் ஆகவுள்ளதாக அறிவித்திருக்கிறார்கள்.
கடந்தாண்டு டி. ராஜேந்தர் அவருடைய பல படைப்புகளையும் ரீ-ரிலீஸ் செய்வதற்கு டி.ஆர் டாக்கீஸ் எனும் புதிய நிறுவனத்தைத் தொடங்கியிருந்தார்.
சமகால தொழில்நுட்பத்திற்கேற்ப மெருகேற்றப்பட்டு ஒவ்வொன்றாக ரீ-ரிலீஸ் ஆகும் எனவும் சொல்லியிருந்தார்.
அதன்படி முதலாவதாக, 1983-ஆம் ஆண்டு வெளியான ‘உயிருள்ளவரை உஷா’ திரைப்படமும் கூடிய விரைவில் ரீ-ரிலீஸ் ஆகும் என எதிர்பார்க்கப்படுகிறது.
from விகடன்
Comments