விஜய் தொலைக்காட்சியில் பிக்பாஸ் சீசன் 8 க்கான புரொமோ ஷூட் தொடங்கியிருப்பதாகத் தெரிகிறது. கமல்ஹாசனுக்குப் பதில் புதிய தொகுப்பாளராக வரவிருப்பது யார் என்கிற சஸ்பென்ஸும் புரொமோவில்தான் தெரியவரலாம் என்கிறார்கள்.
விஜய் தொலைக்காட்சியின் ஃபேவரைட் நிகழ்ச்சிகளில் ஒன்று பிக் பாஸ். கடந்த 2017ம் ஆண்டு முதல் ஒளிபரப்பாகி வரும் இந்த நிகழ்ச்சிக்கென தனியாகப் பார்வையாளர் கூட்டமே இருக்கிறது. வணிக ரீதியில் விஜய் தொலைக்காட்சிக்கு அதிக வருமானம் ஈட்டித்தரும் ஒரு நிகழ்ச்சியாகப் பார்க்கப் படுகிறது இது. இதுவரை 7 சீசன்கள் ஒளிபரப்பாகியுள்ள நிலையில் இந்தாண்டு எட்டாவது சீசன். ஏழு சீசன்கள் வரை நிகழ்ச்சியைத் தொகுத்து வழங்கி வந்த கமல்ஹாசன், 'இந்தாண்டு தான் தொகுத்து வழங்கப் போவதில்லை' என அறிவித்து விட்டார்.
கமல்ஹாசனுக்குப் பதில் அந்த இடத்துக்கு யார் என்பது குறித்துப் பல அனுமானங்கள், தகவல்கள் சமூக வலைத்தளங்களில் விவாதிக்கப்பட்டு வருகின்றன. சரத்குமார், சூர்யா, நயன்தாரா எனப் பல பெயர்கள் அடிபட்டன. இவற்றுள் நடிகர் விஜய் சேதுபதிக்கு அதிக வாய்ப்பிருப்பதாக நாம் ஏற்கெனவே செய்தி வெளியிட்டிருந்தோம். இந்நிலையில் தற்சமயம் படமொன்றின் படப்பிடிப்பிற்காகப் புதுச்சேரியில் தங்கியிருக்கும் விஜய் சேதுபதி அங்குப் புதுச்சேரி துணைநிலை ஆளுநர் கைலாசநாதனைச் சந்தித்தார். இயக்குநர் பாண்டிராஜ் இயக்கும் படத்தின் படப்பிடிப்பு அது. இந்தப் பின்னணியில் 'பிக்பாஸ் நிகழ்ச்சிக்கு விஜய் சேதுபதி கமிட் ஆகி விட்டாரா' என்கிற கேள்வியுடன் விஜய் தொலைக்காட்சி மற்றும் விஜய் சேதுபதி வட்டாரத்தில் சிலரிடம் பேசினோம்.
''அதாவது ஏற்கெனவே கமிட் ஆன படத்தின் படப்பிடிப்பில் கலந்து கொள்ளத்தான் புதுச்சேரி போயிருக்கிறார் அவர். அங்கு ஆளுநரை அவர் சந்தித்தது குறித்த பின்னணி அவருக்கு நெருக்கமான சிலருக்குத்தான் தெரியும்கிறாங்க. ஆனால் பிக்பாஸ் நிகழ்ச்சிக்கு அவர் கமிட் ஆகிட்டார்னுதான் சொல்லப்படுகிறது. ஏன்னா விஜய் டிவியின் பிக்பாஸ் புரொமோ டீம் இப்ப புதுச்சேரியில்தான் தங்கியிருக்கிறார்கள். அதனால் அங்கேயே புரொமோ ஷூட் தொடங்கி எடுக்கப்படலாமென்று தெரியவருகிறது. பட படப்பிடிப்பின் இடையே அவர் நேரம் கொடுத்திருக்கலாம்னு சொல்கிறார்கள்." என்கிறார்கள் அவர்கள்.
அக்டோபர் முதல் அல்லது இரண்டாவது வாரத்தில் பிக்பாஸ் தொடங்கப்பட வேண்டும். அதற்கு ஒரு மாதம் முன்னதாகவாவது புரொமோ வெளியாக வேண்டும். எனவே செப்டம்பர் முதல் வாரத்தில் எப்படியும் புரொமோ வெளியாக நிச்சயம் வாய்ப்பிருப்பதாகச் சொல்கின்றனர் சேனல் தொடர்புடைய சிலர். அநேகமாக இந்த வார இறுதியில் பிக்பாஸ் சீசன் 8 குறித்த முதல் அப்டேட் அதிகாரப்பூர்வமாக வெளியாகலாம்.
from விகடன்
Comments