சமீபத்தில் அனிருத் இசையில் வெளியான படம் ஷங்கரின் `இந்தியன் 2'. அதன் கலவையான விமர்சனங்களை ஓரம் வைத்துவிட்டு வழக்கம் போல் தன் இசையில் கவனம் செலுத்தத் தொடங்கிவிட்டார் அனிருத். அடுத்து ரஜினி, அஜித், என்.டி.ஆர். சிவகார்த்திகேயன் படங்கள் கைவசம் இருப்பதால் அவரது லைன்அப்கள் பிரகாசமாக மிளிர்கின்றன.
ரஜினியின் 'வேட்டையன்' படப்பிடிப்பு நிறைவடைந்துவிட்டதால், இப்போது அதன் பின்னணி இசைக்கோர்ப்பு வேலையை ஆரம்பித்துவிட்டார். செப்டம்பர் முதல் வாரத்தில் 'வேட்டையன்' படத்தின் முதல் சிங்கிளையோ அல்லது டீசரையோ வெளியிடத் திட்டமிட்டு வருகின்றனர். 'வேட்டையன்' படத்தை அடுத்து மீண்டும் ரஜினியுடன் இணைந்துள்ளார் அனிருத். லோகேஷ் கனகராஜ் இயக்கும் 'கூலி'க்கு இசையமைக்கிறார். சமீபத்தில் இதன் படப்பிடிப்பு ஹைதராபாத்தில் தொடங்கியது. 'கூலி'க்கான பாடல்கள் கொடுக்கும் வேலைகளையும் ஆரம்பித்திருக்கிறார்.
அஜித்தின் 'விடாமுயற்சி'யின் படப்பிடிப்பு அஜர்பைஜானில் நடந்து வருகிறது. படத்திற்கான பாடல்களை ஏற்கெனவே கொடுத்திருக்கிறார். மொத்த படப்பிடிப்பும் நிறைவடைந்த பிறகே 'விடாமுயற்சி'யின் பின்னணி இசை வேலைகள் இருக்கும். டோலிவுட்டில் என்.டி.ஆரின் 'தேவரா' படத்தின் ரிலீஸ் தேதி செப்டம்பர் 27ம் தேதி என அறிவிக்கப்பட்டுவிட்டதால் இப்போது 'தேவரா'வின் பின்னணி இசை வேலைகளிலும் கவனம் செலுத்தி வருகிறார். ஏற்கெனவே இதன் முதல் சிங்கிள் பாடல் வெளியாகி வரவேற்பை அள்ளியது.
இதனையடுத்து விக்னேஷ் சிவன் இயக்கத்தில் பிரதீப் ரங்கநாதன், கீர்த்தி ஷெட்டி, கௌரி கிஷன் நடிக்கும் பெயர் அறிவிக்கப்படாத (முன்னர் இருந்த பெயர் 'எல்.ஐ.சி') படத்திற்கும் இசை அனிருத்தான். அதன் முதற்கட்ட படப்பிடிப்பு நடந்து முடிந்திருக்கிறது. இரண்டு பாடல்களைக் கொடுத்துவிட்டார் அனிருத். இதன் அடுத்தகட்ட படப்பிடிப்பு விரைவில் தொடங்குகிறது.
தமிழில் ஏ.ஆர்.முருகதாஸ் இயக்கத்தில் சிவகார்த்திகேயன் நடிக்கும் 'எஸ்.கே.23' படத்திற்கான இசையும் அனிருத்தான். 'கத்தி', 'தர்பார்' படங்களை அடுத்து, ஏ.ஆர்.முருகதாஸுடன் மீண்டும் இணைகிறார் என்பதால், பாடல்களுக்குப் பெரிய எதிர்பார்ப்பு இருக்கிறது. ஏற்கெனவே இரண்டு டூயட்கள் கொடுத்துவிட்டதாகச் சொல்கிறார்கள். இதன் படப்பிடிப்பு இப்போது தூத்துக்குடியில் நடந்து வருகிறது.
விஜய்யின் 'லியோ'விற்கு பின் லோகேஷ் கனகராஜூடன் மீண்டும் கைகோர்த்திருக்கிறார். ரஜினியின் படம் என்பதால் அனிருத் அசத்துவார் என்ற எதிர்பார்ப்பு ரஜினி ரசிகர்களிடம் இருக்கிறது. இது தவிர விஜய்யுடன் மீண்டும் கூட்டணி அமைக்கிறார். ஹெச். வினோத் இயக்கத்தில் விஜய் நடிக்கும் 'விஜய் 69' படத்திற்கு இசை அனிருத்தான் என்ற பேச்சு உள்ளது. இதன் படப்பிடிப்பு அக்டோபரில் தொடங்கும் என்கிறார்கள். இது தவிர கவின் நடிக்கும் படம், 'இந்தியன் 3' ஆகிய படங்களும் அனிருத்தின் லைன் அப்பில் உள்ளன.
from விகடன்
Comments