`கட்டா குஸ்தி', `லால் சலாம்' படங்களுக்குப் பின், நிறுத்தி நிதானமாகத் தனது படங்களைத் தேர்வு செய்து நடித்து வருகிறார் விஷ்ணு விஷால். `முண்டாசுபட்டி', `ராட்சசன்' ராம்குமாரின் இயக்கத்தில் ஒரு படம், `கட்டா குஸ்தி' செல்லா அய்யாவு, `கனா' அருண்ராஜா காமராஜ், `ஜூங்கா' கோகுல் எனப் பலரின் படங்களைக் கைவசம் வைத்திருக்கிறார். நடிப்பில் 21 படங்களையும், தயாரிப்பில் 11 படங்களையும் தாண்டி சாதனை படைத்து வரும் விஷ்ணு விஷாலின் லைன்அப்கள் ஒரு பார்வை...
'முண்டாசுபட்டி', 'ராட்சசன்' படங்களின் வெற்றியை தொடர்ந்து மீண்டும் அதன் இயக்குநர் ராம்குமாருடன் கைகோர்த்துள்ளார் விஷ்ணு. இதன் படப்பிடிப்பு கொடைக்கானலில் மூன்று ஷெட்யூல்கள் நடந்து முடிந்திருக்கிறது. விஷ்ணுவின் ஜோடியாக 'பிரேமலு' படத்தின் மூலம் கவனம் ஈர்த்த மமிதா பைஜூ நடித்து வருகிறார். இந்தாண்டு இதன் ரிலீஸ் இருக்கும் என எதிர்பார்க்கப்படுகிறது.
இதனை அடுத்து 'கட்டா குஸ்தி' இயக்குநர் செல்லா அய்யாவுடன் கூட்டணி அமைத்துள்ளார். இந்தப் படத்தின் கதை விவாதம் தீவிரமாக நடந்து வருகிறது. இதனைத் தொடர்ந்து படப்பிடிப்பு அறிவிப்பு வெளிவரவிருக்கிறது. இதற்கடுத்து 'நெஞ்சுக்கு நீதி' அருண்ராஜா காமராஜ் இயக்கும் படத்தில் நடிக்கிறார் விஷ்ணு.
இதற்கிடையே 'களவு' என்ற படத்தின் மூலம் இயக்குநராக அறிமுகமான முரளி கார்த்திக் இயக்கத்தில் 'மோகன் தாஸ்' என்ற படத்தில் நடித்து முடித்துவிட்டார். அதன் ரிலீஸ் தேதி குறித்த அறிவிப்பும் விரைவில் வெளியாகிறது.
அறிமுக இயக்குநர் டைரக்ஷனில் 'ஆர்யன்' என்ற படத்திலும் நடிக்கிறார் விஷ்ணு. இதன் படப்பிடிப்பும் ஒரு பக்கம் போய்க்கொண்டிருக்கிறது. விஷ்ணுவின் ஜோடியாக ஷ்ரத்தா ஶ்ரீநாத் நடித்து வருகிறார். இது ஒரு போலீஸ் கதை என்கிறார்கள்.
விஜய் சேதுபதியின் 'ஜூங்கா'வை இயக்கிய கோகுலின் கூட்டணியிலும் ஒரு படம் ரெடியாக உள்ளது. கோகுல் இப்போது சிம்புவை வைத்து 'கொரோனா குமார்' என்ற படத்தை இயக்கி வருகிறார். இதனை முடித்துவிட்டு அவர் விஷ்ணுவின் படத்திற்கு வருவார் என்று சொல்கிறார்கள்.
விஷ்ணுவின் சகோதரர் ருத்ராவும், தமிழில் ஹீரோவாகிறார். அவர் நாயகனாக அறிமுகமாகும் படமான 'ஓஹோ எந்தன் பேபி'யை விஷ்ணு தயாரித்து வருகிறார். இதில் மிதிலா பலர் நாயகியாக நடித்து வருகிறார். இதற்கிடையே 'ராட்சசன்' படத்தின் இரண்டாம் பாகத்தையும் தயாரித்து நடிக்க விஷ்ணு விரும்பி வருகிறார் என்கிறார்கள்.
from விகடன்
Comments