TV Rewind 2023: `கதையை மாத்தினா எப்படிங்க நடிக்க முடியும்'; வெளியேறிய நடிகை; காரணம் அதுமட்டும் தானா?
2023 - விடைபெற இன்னும் ஒரு வாரமே இருக்கிறது. புதிய சீரியல்கள் மற்றும் புதுமுகங்களின் வரவுகள், சில சீரியல்களிலிருந்து முக்கியமானவர்களின் வெளியேற்றங்கள், ஹிட் அடித்த மற்றும் கவனிக்கப்டாத சீரியல்கள், என தமிழ்த் தொலைக்காட்சி ஏரியாவில் இந்த ஆண்டில் நிகழ்வுகளுக்கு குறைவில்லைதான்.
கவனிக்கப்பட்ட, ஹைலைட்டான சில நிகழ்வுகளைக் கொஞ்சம் திரும்பிப் பார்க்கலாமா?
ஜீ தமிழ் சேனலில் 2022ம் வருடம் ஆகஸ்ட் மாதம் தொடங்கப்பட்ட சீரியல் 'மீனாட்சி பொண்ணுங்க'. 'சிறந்த நடிகைக்கான தேசிய விருதை ஒன்றுக்கு இருமுறை பெற்ற, இயக்குநர் பாலு மகேந்திராவின் கதாநாயகியான 'வீடு' அர்ச்சனா இந்த சீரியலில் நடிக்கிறார்' எனச் சொல்லி அமர்க்களமாக விளம்பரப்படுத்தித் தொடரை ஆரம்பித்தார்கள். நீண்ட இடைவெளிக்குப் பிறகு டிவி பக்கம் வருவதால் அர்ச்சனாவுமே சீரியலில் நடிப்பது குறித்து உற்சாகமாகவே பேசியிருந்தார்.
'மீனாட்சி பொண்ணுங்க' சீரியலின் கன்னட வெர்ஷன் 'புட்டகன்ன மக்களு', 'ஜீ கன்னடா' சேனலில் ஒளிபரப்பாகி வந்தது. அந்த சீரியல் கன்னட மக்களின் இதயங்களை வென்று ஹிட்டடித்தது. சீரியலின் கதை நகர்வும் அந்த அம்மா கதாபாத்திரமும் எனக்கு ரொம்பவே பிடிச்சிருந்த சூழல்லதான் அதே சீரியலின் தமிழ் வெர்ஷனுக்கு என்னைக் கேட்டு அணுகினாங்க. ஏற்கெனவே பிடிச்சிருந்த கதைங்கிறதால உடனே சம்மதிச்சிட்டேன்" எனச் சொல்லியிருந்தார் அர்ச்சனா
சீரியலும் தொடங்கி எட்டு மாதங்கள் வரை எந்தப் பிரச்னையுமில்லை. அதன்பின் சீரியலிலிருந்து அர்ச்சனா வெளியேறப்போவதாக அரசல் புரலசாகச் செய்திகள் கசிந்து வந்தன. இந்நிலையில் திடீரென ஒருநாள் அந்தச் செய்தி உண்மையானது. ''கதையின் நகர்வு பிடிக்கலைன்னா எப்படிங்க ஒரு புராஜெக்ட்ல தொடர்ந்து இருக்க முடியும்? செய்யற வேலையைப் பிடிச்சு செஞ்சாதானே எல்லாருக்குமே அது நல்லது! அதனால நான் அந்த சீரியலில் இருந்து வெளியேறிட்டேன். எனக்குப் பதிலா வேறு நடிகையைக் கமிட் செய்து கொள்ளும்படி ஏற்கெனவே சம்பந்தப்பட்டவங்ககிட்டச் சொல்லிட்டேன்" என அதையும் நம்மிடம் உறுதிப்படுத்தினார் அர்ச்சனா.
அர்ச்சனாவின் வெளியேற்றத்துக்குக் கதை மட்டும்தான் காரணமா என நாம் விசாரித்தபோது, வேறு சில தகவல்களையும் சிலர் சொன்னார்கள். ஏற்கெனவே ஷூட்டிங் ஸ்பாட்டில் அரச்சனா தரப்பிலிருந்து போதிய ஒத்துழைப்பு கிடைக்காததால் தயாரிப்பு தரப்புமே அவர் மீது கொஞ்சம் வருத்தத்தில் இருந்ததாகவும் அவர்கள் சொன்னார்கள்.
எது எப்படியோ அர்ச்சனா தொடரிலிருந்து வெளியேற, தொடர்ந்து சேனல் தரப்பு அர்ச்சனாவின் கேரக்டரில் நடிக்க நடிகை ஶ்ரீ ரஞ்சனியைக் கமிட் செய்ய தற்போது இவர் நடித்து வருகிறார்.
- நாளையும் திரும்பிப் பார்க்கலாம்
from விகடன்
Comments