பிக் பாஸ் வீட்டிற்குள் எதிரிகள் நண்பர்களாக, நண்பர்கள் எதிரிகளாகிவிட என பல மாற்றங்கள் பிக் பாஸ் வீட்டில் அரங்கேறிக் கொண்டிருக்கின்றன. நிக்சன் புதிய கேப்டனாகத் தேர்வு செய்யப்பட்டிருக்கிறார்.
இந்நிலையில் இந்த வாரம் நடந்த பூகம்ப டாஸ்க்கில் ஹவுஸ்மேட்ஸ் தோல்வியுற்றதால், பழைய போட்டியளார்கள் வீட்டிற்குள் மீண்டும் புதிய போட்டியாளர்களாகக் களமிறங்க உள்ளனர். பிக் பாஸ் தமிழ் சீசன் 7 ல் முதல் வைல்டு கார்டு எண்ட்ரியாக ஒரே நேரத்தில் ஐந்து போட்டியாளர்கள் நிகழ்ச்சிக்குள் போனது நினைவிருக்கலாம்.
தினேஷ், அர்ச்சனா, பிராவோ, அன்ன பாரதி, கானா பாலா ஆகிய அந்த ஐந்து பேரில் தினேஷ், அர்ச்சனா இருவரும் ஆரம்பத்திலேயே ஃபார்முக்கு வந்து வலுவான போட்டியாளர்கள் பட்டியலில் சேர்ந்து விட்டார்களெனச் சொல்லலாம். அன்ன பாரதி சென்ற மறு வாரத்திலேயே எலிமினேட் ஆகி வெளியில் வந்து விட, கடந்த வாரம் கானா பாலாவும் வெளியேறி விட்டார்.
இந்த நிலையில் கமல் கலந்து கொள்ள இந்த வார எவிக்ஷனுக்கான ஷூட்டிங் இன்று காலை பிக் பாஸ் செட்டில் தொடங்கி, தற்போது நடந்து வருகிறது. வழக்கம் போல் கடந்த வாரத்தில் நடந்தவை குறித்து கமல் போட்டியாளர்களூடன் விவாதித்த பிறகு இந்த வாரம் இரண்டாவது வைல்டு கார்டு எண்ட்ரி மூலம் ஏற்கெனவே வெளியேறிய மூன்று போட்டியாளர்கள் உள்ளே நுழைந்த எபிசோடு ஷூட் செய்யப்பட்டது.
இரண்டாவது வைல்டு கார்டு எண்ட்ரி மூலம் விஜய் வர்மா, அனன்யா மற்றும் வினுஷா தேவி ஆகிய மூவரும் நிகழ்ச்சிக்குள் செல்கிறார்களென விகடன் தளத்திலும் ஏற்கெனவே செய்தி வெளியிட்டிருந்தோம். இந்த மூன்று பேரில் வினுஷ தேவி நிகழ்ச்சிக்குள் வரத் தயக்கம் காட்டுவதாக ஒரு தகவல் நேற்று பரவியது. ஒருவேளை வினுஷா தேவி செல்லவில்லையென்றால் அவருக்குப் பதில் பாடகர் யுகேந்திரன் செல்வார் எனச் சொல்கிறார்கள்.
மூன்று பேர் உள்ளே செல்கிற நிலையில் இந்த வார எவிக்ஷனில் எத்தனை பேர் வெளியேறப் போகிறார்கள் என்பது ஒரு எதிர்பார்ப்பாக இருக்கிறது. ப்ரொமோவில் சுட்டிக்காட்டியதை வைத்து உள்ளே செல்லும் மூன்று பேருக்குப் பதில் மூன்று பேர் வெளியேறலாம் என சிலரும், இல்லை வழக்கமான சிங்கிள் எவிக்ஷன் தான் இந்த வாரமும் இருக்கும் என சிலரும் ஆரூடம் சொல்லி வந்த நிலையில் நமக்குக் கிடைத்த எக்ஸ்க்ளூசிவ் தகவலோ இந்த இரண்டும் இல்லை என்கிறது.
ஆமாம், இந்த வாரம் பிக் பாஸ் தமிழ் சீசனில் இரண்டாவது டபுள் எவிக்ஷன் நிகழ இருக்கிறது. அதாவது நிகழ்ச்சியிலிருந்து இன்று இரண்டு பேர் வெளியேறி இருக்கிறார்கள். முதல் நாளிலிருந்தே நிகழ்ச்சியிலிருக்கும் அக்ஷயா மற்றும் வைல்டு கார்டு எண்ட்ரி மூலம் நான்கு வாரங்கள் கழித்து உள்ளே சென்ற ஆர்.ஜே.பிராவோ ஆகிய இரண்டு பேர்தான் அவர்கள். பிக் பாஸ் நிகழ்ச்சியில் கலந்து கொள்வதற்காகவே துபாயிலிருந்து வந்த ஆர்.ஜே பிராவோ வைல்டுகார்டு மூலம் உள்ளே சென்று வெளியில் வரும் மூன்றாவது போட்டியாளர். இரண்டாவது வைல்டு கார்டு மூலம் ரீ எண்ட்ரி கொடுத்திருக்கும் போட்டியாளர்களாவது நிகழ்ச்சியில் நீடிப்பார்களா என்பதை இனி வரும் நாட்களில் பார்க்கலாம்.
from விகடன்
Comments